widgeo.net

2017/03/22

حدوتة



كان يا ماكان ..
حدوتتنا بتبدأ من قديم الزمان ..
بنوتة رقيقة عايشة فى سلام وامان ..
كل همها ان لحظتها تعدى
من غير قلق ولا حرمان ..

دخل الحب قلبها فجأة
من غير خبط ولا استئذان ..
عاشت احلى ايام عمرها
فى احلام وردية واطمئنان ..
فجأة العالم بقى له طعم جديد
وقلب من ابيض واسود لألوان ..

عارف انت الحب لما يسكنك
ويقلب جواك كل ميزان ؟!
او يخطفك من نفسك ويرميك فى اى مكان ؟!
وماتشوفش فى العالم الا حبيبك
ولا تلمح طيف اى انسان ؟!
وكل الكلام حواليك تسمعه
كأنه غنا بصوت رنان ..
وتلاقى نفسك فجأة بتقول اشعار
ولا اجدعها فنان ..

عارف بقى لما تصحى من الحلم
وكأن كل اللى جرى ماكان ؟!
وتشوف الدنيا ضلمة
وكأنك حبيت وهم او بقايا انسان ؟
شئ بارد كل اللى جواه صخر
وقلب فاضى مش عارف يديك ذرة حنان !
وتحاول وتضحى وتستحمل
والنهاية اهو كان كله كلام فى كلام !
وقت وكان بيتقضى
واهى اى عيشة والسلام ..
ويقولك .. انت فعلا كنت عايش فى الاحلام ..

لاهو انت كنت فاكر انى بسهولة احبك ؟
وانى لما لصدرى اضمك ..
كده خلاص عشقتك ؟!
وان كل يومى يبقى انت ..
اكون فى هواك دايب او بحسك ؟!
وان روحى تبقى روحك ..
ونبضى جوة قلبك ..
وكلامى قبل ماقوله بسمعه منك ..
ابقى خلاص لك وبيك
وماعرفش فى يوم اقول انى بعتك ؟؟!

وصحيت من حلمها على جرح جديد
كأن مش مكتوبلها تعيش يوم سعيد
وكل اللى يدخل قلبها ..
لازم تكون مشاعره حديد

او يمكن العيب من عندها !
وهى اللى مش عارفة تحافظ على قلبها ..
ومش عارفة لمين تدى حبها ..

وتوتة توتة
خلصت ببساطة الحدوتة
حلوة ولا ملتوتة ؟؟!

تمت

Related Posts Plugin for WordPress, Blogger...

Template by:

Free Blog Templates