وبناءا علي طلب الجميلة لوسي فقد قررت أنا واعوذ بالله من كلمة أنا ^_^ المدعوة كارمن ان اعترف اخيرا بدل ما تحبسوني ^_^ يلا نبدأ
أعترف اني باخد موقف بصعوبة وبروق واصفي بسرعة
أعترف اني مابعرفش اصد اي حد محتاجلي حتي لو جرحني كتير ولو رجع بعد الف مرة برضه بسامح
اعترف ان اكتر حاجة تخليني الغي شخص من حياتي هي انه يسقط من نظري وافقد احترامي له بعد مكانة عالية وصلها في قلبي كان مزيفها
اعترف ان الجراح بتعلمني كتير واني بحاول اقول للي جرحني شكرا انك علمتني بدل كلمة ارد بها كرامتي
اعترف اني بعشق الاطفال وبنسي نفسي وسطهم لو بي هموم الدنيا كلها ونفسي اجيب بنوتة واحدة تاخد كل حناني واهتمامي
اعترف اني من صغري شايل مسؤولية ودور كبير في البيت كبر سني قبل اواني وماعرفش لحد دلوقت دي حاجة حلوة ولا وحشة
اعترف اني بحب الوحدة جدا لكن بحب الاصحاب وصحبتهم في اوقات متفرقة خصوصا وانا مدايقة
اعترف ان كل اصدقائي المقربين كلهم عرفتهم من النت وعرفت منهم ناس قمة في الاحترام والوفاء والاخلاص بس برضه اكيد اتلسعت مرتين تلاتة من الكدب والخداع
اعترف انكم بجد بقيتم اقرب ناس لي برتاح وافضفض معاكم وعارفين كل انفعالاتي وافكاري
اعترف اني مش ملاك ولا مثالية بس بحاول اكون في الصورة اللي ارضي بها عن نفسي
اعترف اني صريحة جدا ومباشرة وبكره اللف والدوران وبحب كل تعاملاتي تكون بوضوح مع نفسي واهلي واصدقائي والمحيطين
اعترف ان الناس ممكن تشوفني غامضة او متحفظة لكن انا ابسط من كده بكتير ومعظم الناس بيستغربوا اما بيتعاملوا معايا
والاعتراف الخطير ^_^
اعترف ان اتجرحت جرحين عملوا بيني وبين الحب حاجز عاوز شخص متفهم يحبني بجد عشان يقدر يكسره بس انا عندي احساس كبير ان الشخص ده موجود
اعترف اني بيصعب علي نفسي جدا اذا حد ظلمني وممكن اقفل علي نفسي وابكي بالساعات لان دموعي قريبة جدا وانا وحدي بس صعب حد يشوفها دايما الناس تشوفني في منتهي القوة
اعترف ان الكتابة لي مش مجرد حروف في صفحة لكن حياة واحاسيس وكل كلمة كتبتها بتعبر عني بشكل او باخر
اعترف طيبة جدا بس مش عبيطة واذا حد افتكرني كده فهو في الاخر هيخسرني اما يعرف حقيقتي
اعترف اني قعدت علي الكرسي ده مرتين وعمري ما ازهق من كلامي معاكو
كفاية بقي عليكم زمانكم بتقولو البت دي قعدت عندنا كتير ^_^
السلام عليكم
37 Comments
